قطر اور پاکستان کیساتھ پیغامات کا تبادلہ کررہے ہیں: ایران کی تصدیق

ایرانی وزیرِ خارجہ سید عباس عراقچی نے امریکہ کے ساتھ رابطہ ذرائع پر اہم وضاحت جاری کرتے ہوئے کہا ہے کہ پاکستان اور قطر کے ذریعے پیغامات کا تبادلہ ضرور جاری ہے، لیکن اسے واشنگٹن کے ساتھ باقاعدہ یا براہِ راست مذاکرات کا نام نہیں دیا جا سکتا۔

ایرانی ذرائع ابلاغ کو دیے گئے اپنے ایک اہم بیان میں عباس عراقچی نے کہا کہ امریکہ کے ساتھ باقاعدہ مذاکرات کی بحالی سے متعلق فی الحال کوئی فیصلہ نہیں ہوا ہے اور نہ ہی فوری طور پر ایسے مذاکرات کی بحالی کا کوئی واضح امکان نظر آتا ہے۔ انہوں نے واضح کیا کہ قطر اور پاکستان بطور ثالثی و سفارتی رابطے کے ذرائع استعمال ہو رہے ہیں اور ان کے ذریعے فریقین کے مابین صرف پیغامات پہنچائے جا رہے ہیں۔

سید عباس عراقچی نے مزید کہا کہ تہران اپنے قومی مفادات اور دفاعی ترجیحات کو مدِنظر رکھتے ہوئے ہی کوئی اگلا قدم اٹھائے گا۔ فی الوقت پاکستان اور قطر کے ذریعے جاری یہ غیر مستقیم سفارتی رابطے کشیدگی میں کمی اور پیغامات کی ترسیل تک محدود ہیں اور اسے کسی پیش رفت یا باضابطہ سفارتی مذاکراتی عمل سے تعبیر نہیں کیا جانا چاہیے۔