پاکستان سٹاک ایکسچینج نے کارکردگی اور منافع میں 15 ممالک کو پیچھے چھوڑ دیا

پاکستان اسٹاک ایکسچینج (پی ایس ایکس) نے کارکردگی اور منافع کے لحاظ سے 15 ممالک کو پیچھے چھوڑتے ہوئے عالمی سطح پر نمایاں مقام حاصل کر لیا ہے، جبکہ اسٹاک سرمایہ کاروں کی تعداد بھی تاریخ کی بلند ترین سطح پر پہنچ گئی ہے۔

پی ایس ایکس کی خصوصی رپورٹ کے مطابق پاکستان اسٹاک ایکسچینج میں سرمایہ کاری کرنے والے سرمایہ کاروں نے 50 فیصد سے زائد منافع حاصل کیا، جبکہ کارکردگی کے اعتبار سے پاکستان اسٹاک ایکسچینج بھارت، سری لنکا، متحدہ عرب امارات اور چین کی اسٹاک مارکیٹس سے کہیں بہتر رہی۔

رپورٹ میں بتایا گیا ہے کہ پاکستان اسٹاک ایکسچینج کی ریکارڈ رفتار نے مارگن اسٹینلے کیپیٹل انٹرنیشنل (MSCI) کے کئی عالمی انڈیکسز کو بھی پیچھے چھوڑ دیا، جبکہ ہانگ کانگ، جاپان، سنگاپور اور ترکیہ کے حصص بازار بھی پی ایس ایکس کا مقابلہ نہ کر سکے۔

اعداد و شمار کے مطابق پاکستان اسٹاک ایکسچینج 15 ممالک کی فہرست میں دوسرے نمبر پر آ گئی ہے۔ پہلی بار نئے سرمایہ کاروں کی تعداد میں 30 فیصد اضافہ ریکارڈ کیا گیا، جس کے بعد نئے انویسٹرز کی تعداد 1 لاکھ 60 ہزار سے تجاوز کر گئی۔

رپورٹ کے مطابق پاکستان اسٹاک ایکسچینج میں سرمایہ کاروں کی مجموعی تعداد بھی پہلی بار 4 لاکھ 64 ہزار کی حد عبور کر گئی ہے، جو ملکی سرمایہ مارکیٹ پر بڑھتے ہوئے اعتماد کا واضح ثبوت ہے۔