آئی ایم ایف کے ساتھ کلائمیٹ فنانسنگ کا 1.3 ارب ڈالر کا معاہدہ طے کر لیا

اسلام آباد میں منعقدہ ایک بین الاقوامی کانفرنس سے خطاب کرتے ہوئے وفاقی وزیر خزانہ محمد اورنگزیب نے کہا کہ عالمی معیشت میں ترقی کی رفتار میں اضافہ ہو رہا ہے جبکہ پاکستان میں بھی معاشی استحکام کے لیے اسٹرکچرل اصلاحات کی جا رہی ہیں۔

انہوں نے کہا کہ موجودہ عالمی حالات میں غیر یقینی صورتحال اور سیاسی کشیدگی میں اضافہ ہوا ہے، تاہم پاکستان اپنی معیشت کو مضبوط بنیادوں پر استوار کرنے کے لیے پرعزم ہے۔ وزیر خزانہ نے کہا کہ نجی شعبہ ملکی معیشت میں ریڑھ کی ہڈی کی حیثیت رکھتا ہے، اس کا کردار بڑھنا خوش آئند ہے۔

محمد اورنگزیب نے بتایا کہ پاکستان کریپٹو کونسل قائم کی جا چکی ہے جو ورچوئل ایسٹ ریگولیٹری اتھارٹی آرڈیننس کے تحت کام کر رہی ہے۔ انہوں نے کہا کہ حکومت اس نظام کو بزنس کے نقطہ نظر سے مزید مستحکم بنانا چاہتی ہے اور اس حوالے سے جلد قانون سازی کی جائے گی۔

وزیر خزانہ نے کلائمیٹ فنانسنگ کو دنیا کا بڑھتا ہوا چیلنج قرار دیتے ہوئے کہا کہ موسمیاتی تبدیلیوں نے عالمی معیشت کو بری طرح متاثر کیا ہے۔ ان کا کہنا تھا کہ پاکستان میں نجی شعبے کی شمولیت اور کردار میں اضافہ خوش آئند پیش رفت ہے۔

محمد اورنگزیب نے انکشاف کیا کہ پاکستان نے آئی ایم ایف کے ساتھ کلائمیٹ فنانسنگ کا 1.3 ارب ڈالر کا معاہدہ طے کر لیا ہے جبکہ ایشین ڈویلپمنٹ بینک (ADB) نے بھی 50 کروڑ ڈالر کے پیکیج کا اعلان کیا ہے۔ اس کے علاوہ عالمی بینک کے ساتھ 10 سالہ کنٹری پارٹنرشپ فریم ورک بھی طے پا چکا ہے، جس کے تحت پاکستان کو ہر سال دو ارب ڈالر ملیں گے۔

انہوں نے مزید کہا کہ پاکستان جلد چینی کیپٹل مارکیٹ میں پانڈا بانڈ جاری کرے گا، جبکہ ملک کو اپنے کلائمیٹ اور آبادی کے مسائل کو 100 سال کی تکمیل سے پہلے حل کرنا ہوگا۔

وزیر خزانہ نے واضح کیا کہ اس مقصد کے لیے کسی آئینی ترمیم یا نئے اداروں کی ضرورت نہیں، بلکہ موجودہ ڈھانچے کو مؤثر بنانا کافی ہے۔ انہوں نے کہا کہ پاکستان آئی ایم ایف کی اگلی قسط اور اصلاحات کے حوالے سے درست سمت میں گامزن ہے۔