نئے سال کی پہلی بڑی غیر ملکی سرمایہ کاری، ویون گروپ کا پاکستان میں 2 کروڑ ڈالر سرمایہ کاری کا اعلان

پاکستان میں نئے سال کے آغاز پر غیر ملکی سرمایہ کاری کی ایک بڑی خوشخبری سامنے آ گئی ہے۔ تیل و گیس اور کیپٹل مارکیٹ میں مثبت پیش رفت کے بعد اب بینکنگ شعبے سے بھی اہم سرمایہ کاری کی اطلاع موصول ہوئی ہے۔

عالمی ڈیجیٹل آپریٹر ویون گروپ نے پاکستان میں 2 کروڑ ڈالر کی سرمایہ کاری کا اعلان کر دیا ہے۔ امریکی اسٹاک ایکسچینج میں لسٹڈ ویون گروپ یہ سرمایہ کاری موبی لنک بینک میں کرے گا، جسے ملک کے ڈیجیٹل بینکنگ شعبے کے لیے ایک اہم پیش رفت قرار دیا جا رہا ہے۔

موبی لنک بینک کے چیئرمین عامر ابراہیم نے غیر ملکی سرمایہ کاری کی تصدیق کرتے ہوئے بتایا کہ اس سرمائے کے ذریعے بینک کے ڈیجیٹل بینکنگ آپریشنز کو مزید وسعت دی جائے گی۔

ان کا کہنا تھا کہ نئی سرمایہ کاری سے ڈیجیٹل مالیاتی خدمات کو بہتر بنایا جائے گا، جس سے مالی شمولیت کو فروغ ملے گا اور صارفین کو جدید، محفوظ اور آسان بینکنگ سہولیات فراہم کی جا سکیں گی۔