ہندو برادری کے افراد کو داخلے سے روکنے کے الزام مسترد، پاکستان کا دوٹوک موقف

پاکستان نے ہندو برادری کے افراد کو ملک میں داخلے سے روکنے کے الزامات کو مکمل طور پر مسترد کرتے ہوئے انہیں بے بنیاد اور گمراہ کن قرار دیا ہے۔

دفترِ خارجہ کے ترجمان طاہر حسین اندرابی نے میڈیا کے سوالات کے جواب میں اپنے تحریری بیان میں کہا کہ “حقائق کو توڑ مروڑ کر پیش کرنے کی کوشش کی جا رہی ہے۔”

ترجمان کے مطابق نئی دہلی میں پاکستانی ہائی کمیشن نے بابا گرو نانک کی سالگرہ کی تقریبات کے موقع پر چار سے 13 نومبر 2025 تک بھارت سے آنے والے 2,400 سے زائد سکھ یاتریوں کو ویزے جاری کیے۔

انہوں نے بتایا کہ چار نومبر کو کل 1,932 یاتری اٹاری واہگہ بارڈر کے ذریعے پاکستان میں داخل ہوئے، تاہم تقریباً 300 ویزا رکھنے والے افراد کو بھارتی حکام نے سرحد عبور کرنے سے روک دیا۔

ترجمان نے واضح کیا کہ پاکستانی امیگریشن کا پورا عمل منظم اور بغیر کسی رکاوٹ کے مکمل ہوا۔
انہوں نے کہا کہ “چند افراد کے پاس نامکمل دستاویزات تھیں اور وہ امیگریشن حکام کو تسلی بخش جوابات نہ دے سکے، اس لیے انہیں معیاری طریقہ کار کے تحت واپس بھیج دیا گیا۔”

ترجمان دفترِ خارجہ نے اس تاثر کو قطعی طور پر غلط اور بدنیتی پر مبنی قرار دیا کہ ان افراد کو مذہبی بنیادوں پر داخلے سے روکا گیا۔

ان کا کہنا تھا کہ پاکستان ہمیشہ تمام مذاہب کے یاتریوں کو اپنے مقدس مقامات کی زیارت کے لیے خوش آمدید کہتا ہے اور اس مقصد کے لیے آسان اور شفاف نظام قائم ہے۔

انہوں نے مزید کہا کہ یہ اقدام خالصتاً انتظامی نوعیت کا تھا اور پاکستان کو اپنی سرزمین میں داخلے کو کنٹرول کرنے کا خودمختار حق حاصل ہے۔

ترجمان نے اس معاملے کو مذہبی رنگ دینے کی بھارتی کوشش کو افسوس ناک قرار دیتے ہوئے کہا کہ اس سے بھارتی حکومت اور میڈیا کی تعصب زدہ سوچ ظاہر ہوتی ہے جو وقت کے ساتھ مزید بڑھتی جا رہی ہے۔