اسلام آباد: وزارت خزانہ کی ماہانہ معاشی آؤٹ لک رپورٹ جاری، اہم معاشی اشاریے مثبت

وزارت خزانہ کی جانب سے ماہانہ معاشی آؤٹ لک رپورٹ جاری کر دی گئی ہے جس کے مطابق پاکستان کی معیشت میں بہتری کا رجحان برقرار ہے اور رواں مالی سال کے دوران بیشتر اہم معاشی اشاریے مثبت رہے۔

رپورٹ کے مطابق رواں مالی سال کی پہلی سہ ماہی میں جی ڈی پی نمو 3.71 فیصد ریکارڈ کی گئی۔ شعبہ جاتی کارکردگی میں زراعت 2.89 فیصد، صنعت 9.38 فیصد اور خدمات کے شعبے میں 2.35 فیصد اضافہ ہوا۔

وزارت خزانہ کا کہنا ہے کہ ترسیلاتِ زر میں نمایاں اضافہ ہوا ہے جبکہ زرمبادلہ کے ذخائر مارچ 2022 کے بعد بلند ترین سطح پر پہنچ گئے ہیں۔ آئی ایم ایف کے جائزے کے بعد پاکستان کو 1.2 ارب ڈالر موصول ہوئے جس سے معاشی استحکام کو تقویت ملی۔

رپورٹ کے مطابق ربیع 2025-26 کے لیے گندم کا ہدف 29.68 ملین ٹن مقرر کیا گیا ہے جبکہ زرعی قرضوں کی فراہمی میں 18.6 فیصد اضافہ ریکارڈ کیا گیا۔ لارج اسکیل مینوفیکچرنگ میں جولائی تا اکتوبر 5.02 فیصد اضافہ ہوا۔

آٹوموبائل سیکٹر میں نمایاں بہتری دیکھی گئی جہاں کاروں کی پیداوار میں 65 فیصد اضافہ ریکارڈ کیا گیا۔ نومبر 2025 میں مہنگائی کم ہو کر 6.1 فیصد کی سطح پر آ گئی۔

مالیاتی اعداد و شمار کے مطابق جولائی تا اکتوبر مجموعی مالیاتی سرپلس جی ڈی پی کا 1 فیصد رہا، ایف بی آر محصولات میں 10.2 فیصد اضافہ ہوا جبکہ نومبر میں کرنٹ اکاؤنٹ 100 ملین ڈالر سرپلس رہا۔

رپورٹ میں بتایا گیا ہے کہ درآمدات میں 11.1 فیصد اضافہ جبکہ برآمدات میں 3.2 فیصد کمی ریکارڈ کی گئی۔ تاہم آئی ٹی برآمدات 18.5 فیصد بڑھ کر 1.8 ارب ڈالر تک پہنچ گئیں اور ترسیلاتِ زر 9.3 فیصد اضافے سے 16.1 ارب ڈالر ہو گئیں۔

مزید بتایا گیا کہ دسمبر 2025 میں پالیسی ریٹ 50 بیسس پوائنٹس کم ہو کر 10.5 فیصد پر آ گیا۔ نومبر 2025 میں اسٹاک ایکسچینج کا 100 انڈیکس 5,046 پوائنٹس بڑھا جبکہ مارکیٹ کیپٹلائزیشن 18,866 ارب روپے تک پہنچ گئی۔

وزارت خزانہ کے مطابق یہ اعداد و شمار معاشی استحکام، سرمایہ کاروں کے اعتماد اور مستقبل میں پائیدار ترقی کی عکاسی کرتے ہیں۔