قومی ایئرلائن کی نجکاری: فوجی فرٹیلائزر کمپنی عارف حبیب کنسورشیم میں شامل

قومی ایئرلائن کی نجکاری کے معاملے پر فوجی فرٹیلائزر کمپنی (ایف ایف سی) عارف حبیب کنسورشیم میں شامل ہوگئی ہے۔ اس حوالے سے جاری اعلامیے کے مطابق یہ شراکت ایئرلائن کی مالی معاونت اور کارپوریٹ مہارت فراہم کرنے کے لیے کی گئی ہے۔

اعلامیے میں بتایا گیا کہ کنسورشیم نے 135 ارب روپے کی سب سے زیادہ بولی دے کر قومی ایئرلائن کے 75 فیصد حصص حاصل کیے ہیں، جبکہ فوجی فرٹیلائزر کمپنی عارف حبیب کنسورشیم کے ساتھ انتظامی ڈھانچے کا حصہ ہوگی۔

اعلامیے کے مطابق ایئرلائن کے زمینی آپریشنز کی اپ گریڈیشن کے لیے پہلے سال 125 ارب روپے کی سرمایہ کاری کی جائے گی۔

واضح رہے کہ پی آئی اے کی نجکاری کے عمل میں عارف حبیب کنسورشیم نے 135 ارب روپے کی سب سے زیادہ بولی دے کر کامیابی حاصل کی، جبکہ دوسرے نمبر پر لکی کنسورشیم نے 134 ارب روپے کی بولی دی تھی۔