پاکستان اور ایشیائی ترقیاتی بینک کے درمیان 730 ملین ڈالر کے دو اہم منصوبوں پر دستخط

پاکستان اور ایشیائی ترقیاتی بینک (اے ڈی بی) کے درمیان مجموعی طور پر 730 ملین ڈالر کے دو اہم منصوبوں پر دستخط ہوگئے۔ ترجمان اقتصادی امور کے مطابق 330 ملین ڈالر مالیت کے سیکنڈ پاور ٹرانسمیشن منصوبے اور 400 ملین ڈالر کے سرکاری ملکیتی اداروں (ایس او ایز) کے ٹرانسفارمیشن پروگرام کے معاہدوں پر دستخط کیے گئے۔

سیکرٹری اقتصادی امور نے بتایا کہ پاور ٹرانسمیشن منصوبہ آئندہ پن بجلی کے منصوبوں سے 2,300 میگاواٹ بجلی کی قابلِ اعتماد ترسیل ممکن بنائے گا، جبکہ ایس او ای ٹرانسفارمیشن پروگرام کے ذریعے ایس او ای ایکٹ اور پالیسی پر مؤثر عملدرآمد یقینی بنایا جائے گا۔

اے ڈی بی کی کنٹری ڈائریکٹر ایما فان نے ان اقدامات کے لیے حکومتِ پاکستان کے مضبوط عزم کو سراہتے ہوئے کہا کہ سرکاری ملکیتی اداروں کی اصلاحات کا یہ پروگرام حکومتی اصلاحاتی کوششوں کو مزید تقویت فراہم کرے گا۔