پوتن اور شی میں مذاکرات دوستانہ ماحول میں ہوئے، ٹرمپ سے بھی بات چیت ہوگی: کریملن
Web Desk
19 November 2026
روسی صدر ولادیمیر پوتن اور چینی صدر شی جن پنگ کے درمیان انتہائی دوستانہ ماحول میں اہم اور مفید دوطرفہ مذاکرات ہوئے ہیں، جبکہ روسی صدر کی امریکی صدر ڈونلڈ ٹرمپ سے بھی باضابطہ ملاقات متوقع ہے، جس کے حوالے سے کریملن نے امید ظاہر کی ہے کہ یہ گفتگو مفید اور اہم عالمی امور پر مشتمل ہوگی۔
روسی صدر کے خارجہ پالیسی کے معاون یوری اوشاکوف نے روسی صحافی پاویل زاروبن سے گفتگو کرتے ہوئے بتایا کہ صدر ولادیمیر پوتن اور امریکی صدر ڈونلڈ ٹرمپ کے درمیان ملاقات چین کے شہر شینزن میں جاری ایشیا پیسیفک اقتصادی تعاون تنظیم (ایپیک) کے سربراہی اجلاس کے مکمل اجلاس (پلینری سیشن) کے اختتام پر شروع ہوگی، جس میں روس اور امریکا کے اعلیٰ حکام بھی شریک ہوں گے۔ انہوں نے صحافیوں کو ہدایت کی کہ وہ مکمل اجلاس کے بعد دونوں صدور کی ملاقات کا انتظار کریں، کیونکہ ماسکو کو امید ہے کہ یہ گفتگو انتہائی معلوماتی اور تعمیری ثابت ہوگی۔
یوری اوشاکوف کے مطابق شینزن میں بدھ کے روز منعقدہ استقبالیہ تقریب کے دوران صدر پوتن عالمی رہنماؤں کی خصوصی توجہ کا مرکز بنے رہے اور متعدد ممالک کے سربراہان ان سے گفتگو کے خواہش مند دکھائی دیے۔ اس موقع پر روسی اور امریکی صدور کے درمیان بھی چند جملوں کا تبادلہ ہوا، تاہم نشستیں الگ ہونے کے باعث باقاعدہ تفصیلی بات چیت نہیں ہو سکی تھی۔
روسی صدر کے معاون نے مزید انکشاف کیا کہ صدر پوتن، صدر ٹرمپ اور چینی صدر شی جن پنگ کے درمیان 19 نومبر کو ہونے والی اہم سہ فریقی ملاقات کے لیے تینوں ممالک کے وفود کی تشکیل پر اتفاق ہو چکا ہے، تاہم روسی وفد میں شامل حکام کے نام فی الحال ظاہر نہیں کیے جائیں گے۔ ان کا کہنا تھا کہ اس سہ فریقی ملاقات کا دورانیہ تینوں سربراہان خود طے کریں گے جو گفتگو کی نوعیت اور پیش رفت پر منحصر ہوگا۔
صدر پوتن اور چینی صدر شی جن پنگ کی ملاقات کی تفصیلات بتاتے ہوئے یوری اوشاکوف نے کہا کہ دونوں رہنماؤں نے مکمل باہمی اعتماد کی فضا میں کھل کر بات چیت کی، جس میں بین الاقوامی و علاقائی صورتحال کے فوری نوعیت کے معاملات، یوکرین تنازع کے پُرامن حل اور ابوظہبی میں ہونے والے مذاکرات کے تازہ دور کی پیش رفت کا تفصیلی جائزہ لیا گیا۔
امریکی شہر میامی میں ہونے والے آئندہ جی 20 سربراہی اجلاس میں صدر پوتن کی ممکنہ شرکت سے متعلق سوال پر اوشاکوف نے کہا کہ اس بارے میں حتمی فیصلہ کرنا ابھی قبل از وقت ہے اور آئندہ ایک دو روز میں اس پر کسی فیصلے کا امکان نہیں۔
دوسری جانب صدر ٹرمپ کی روسی اور چینی صدور سے ملاقاتوں پر سابق امریکی وزیرِ خارجہ ہلیری کلنٹن کی تنقید کا جواب دیتے ہوئے یوری اوشاکوف نے کہا کہ امریکی صدر اپنے فیصلے خود کرتے ہیں اور اپنے ملک کے مفادات کو مدنظر رکھتے ہوئے ایجنڈا ترتیب دیتے ہیں، جبکہ ہلیری کلنٹن کی حد سے زیادہ تنقید خود امریکی تشخص کو نقصان پہنچاتی ہے۔
متعلقہ عنوانات
ٹرمپ نے ایران جنگ ختم کروانے کیلئے چین اور روس سے مدد لینے کا امکان مسترد کر دیا
19 November 2026
بلوچستان میں امن، خوشحالی، پائیدار ترقی کیلئے پاک فوج کا غیر متزلزل عزم برقرار ہے: فیلڈ مارشل
19 November 2026
عالمی امن کیلئے باہمی تعاون پر مبنی سلامتی پالیسی ناگزیر ہے، وزیر دفاع
19 November 2026
مشرق وسطیٰ میں کشیدگی کے باوجود خلیجی ممالک محفوظ ترین ممالک میں سرفہرست
19 November 2026
اسرائیل کا غزہ میں بڑا فوجی آپریشن، ٹینکوں کی پیش قدمی، ہزاروں فلسطینیوں کی نقل مکانی
19 November 2026
سربراہ امریکی سینٹرل کمانڈ کا اسرائیل کا دورہ، آرمی چیف سمیت اعلیٰ حکام سے ملاقاتیں
19 November 2026
ایرانی نیٹ ورکس کیخلاف کریک ڈاؤن: امریکا کی لبنان میں مقیم 3 افراد اور اداروں پر پابندیاں عائد
19 November 2026
سعودیہ نے حوثی باغیوں کے داغے گئے 2 میزائل اور 2 ڈرونز تباہ کر دیئے
19 November 2026