غربت کے خاتمے کا سب سے بڑا ہتھیار تعلیم اور محنت ہے: احسن اقبال

وفاقی وزیر احسن اقبال نے کہا ہے کہ غربت کے خاتمے کا سب سے بڑا ہتھیار تعلیم اور محنت ہے، اس لیے والدین اپنی اولاد کی تعلیم کو زندگی کا سب سے بڑا مشن بنائیں اور اس پر کسی قسم کا سمجھوتہ نہ کریں۔ اپنے آبائی حلقے نارووال میں ’پنجاب دھی رانی پروگرام‘ کی تقریب سے خطاب کرتے ہوئے احسن اقبال نے مستحق خاندانوں کو مبارکباد پیش کی اور زور دیا کہ حکومت کی جانب سے فراہم کی جانے والی مالی معاونت کو بچوں کی تعلیم، ترقی اور روشن مستقبل کی تعمیر پر خرچ کیا جائے تاکہ آنے والی نسل خودکفیل بن سکے اور خاندان خوشحالی کی راہ پر گامزن ہوں۔ انہوں نے مزید کہا کہ نارووال میں میڈیکل، انجینئرنگ اور ایگریکلچر سمیت اعلیٰ تعلیم کے تمام بڑے مواقع فراہم کر دیے گئے ہیں جو نوجوانوں کو کامیابی کے نئے آسمانوں تک پہنچانے اور غربت کے خاتمے کے خواب کو حقیقت بنانے میں کلیدی کردار ادا کریں گے۔