اقتصادی تعاون تنظیم اجلاس کی کوریج کیلئے میڈیا فسیلی ٹیشن سینٹر کا افتتاح

اقتصادی تعاون تنظیم (ای سی او) کے اہم اجلاس کی بھرپور اور مؤثر میڈیا کوریج کے لیے وفاقی دارالحکومت اسلام آباد کے پاک چائنہ فرینڈشپ سینٹر میں جدید سہولیات سے آراستہ میڈیا فسیلی ٹیشن سینٹر قائم کر دیا گیا ہے۔

وفاقی سیکرٹری اطلاعات و نشریات اشفاق احمد خلیل نے باضابطہ طور پر میڈیا فسیلی ٹیشن سینٹر کا افتتاح کیا اور وہاں ملکی و غیر ملکی صحافیوں کو فراہم کی جانے والی پیشہ ورانہ سہولیات اور انتظامی انتظامات کا تفصیلی جائزہ لیا۔ وزارتِ اطلاعات و نشریات کی جانب سے قائم کیے گئے اس خصوصی میڈیا سینٹر کا بنیادی مقصد ای سی او اجلاس کی بروقت، تیز رفتار اور مؤثر کوریج کے لیے صحافیوں کو عالمی معیار کی سہولیات فراہم کرنا ہے، اس موقع پر وفاقی سیکرٹری اطلاعات کو سینٹر میں دستیاب تمام تکنیکی سہولیات کے حوالے سے تفصیلی بریفنگ بھی دی گئی۔

میڈیا سے گفتگو کرتے ہوئے اشفاق احمد خلیل نے کہا کہ وزارتِ اطلاعات و نشریات نے ای سی او اجلاس کی بہترین میڈیا کوریج یقینی بنانے کے لیے بھرپور اور جامع اقدامات کیے ہیں۔ ان کا کہنا تھا کہ میڈیا فسیلی ٹیشن سینٹر میں صحافیوں کی سہولت کے لیے تیز رفتار انٹرنیٹ، خصوصی ورکنگ ڈیسک، جدید ڈیجیٹل سٹوڈیو اور پوڈکاسٹ سٹوڈیو کی سہولت فراہم کی گئی ہے، جبکہ سرکاری اعلانات اور میڈیا بریفنگز کے لیے مخصوص کانفرنس رومز بھی قائم کیے گئے ہیں۔

دورے کے دوران وفاقی سیکرٹری اطلاعات نے پاک چائنہ فرینڈشپ سینٹر میں قائم خصوصی کلچرل پویلین اور وہاں لگائے گئے مختلف ثقافتی سٹالز کا بھی معائنہ کیا۔ انہوں نے کہا کہ کلچرل پویلین میں پاکستان کی مالا مال ثقافت، روایات اور دستکاری کے خوبصورت رنگ نمایاں کیے گئے ہیں، جس سے اجلاس میں شریک غیر ملکی مہمانوں اور بین الاقوامی صحافیوں کو پاکستانی ثقافت اور مہمان نوازی سے قریب سے روشناس ہونے کا بہترین موقع ملے گا۔