شیر کے حملے سے نوجوان کی ہلاکت کا مقدمہ، ورثا نے ملزمان کو معاف کر دیا

لاہور کے علاقے کاہنہ میں شیر کے حملے سے شہری طلحہ کی ہلاکت کے مقدمے میں اہم قانونی پیش رفت سامنے آئی ہے، جہاں جاں بحق نوجوان کے ورثا نے اللہ کی رضا کی خاطر گرفتار دونوں ملزمان کو معاف کر دیا، جس کے بعد عدالت نے ملزمان کی ضمانت منظور کرتے ہوئے ان کی رہائی کا حکم دے دیا ہے۔

ماڈل ٹاؤن کچہری لاہور میں اس مقدمے کی سماعت جوڈیشل مجسٹریٹ قیصر ریاض نے کی۔ سماعت کے آغاز پر متعلقہ پولیس نے گرفتار ملزمان فیاض احمد اور نعمان حسن کو سخت سکیورٹی میں عدالت کے روبرو پیش کیا اور واقعے کی مزید تفتیش مکمل کرنے کے لیے عدالت سے ملزمان کے سات روزہ جسمانی ریمانڈ کی استدعا کی۔

تاہم دورانِ سماعت جاں بحق نوجوان طلحہ کے قانونی ورثا بھی عدالت میں پیش ہوئے اور مجسٹریٹ کے روبرو اپنا باقاعدہ بیان ریکارڈ کراتے ہوئے آگاہ کیا کہ انہوں نے معاملہ طے کر لیا ہے اور وہ اللہ کی رضا کی خاطر دونوں گرفتار ملزمان کو معاف کرتے ہیں۔ ورثا کی جانب سے عدالتی ریکارڈ کا حصہ بنانے کے لیے تحریری بیان کے ہمراہ تصدیق شدہ بیانِ حلفی بھی جمع کرایا گیا۔

دوسری جانب سرکاری وکیل نے عدالت میں اس راضی نامے کی سخت مخالفت کرتے ہوئے مؤقف اختیار کیا کہ ملزمان نے ایک انتہائی سنگین نوعیت کا جرم کیا ہے، اس لیے قانون کے مطابق تفتیش کے تقاضے پورے کرنے کی خاطر ان کا جسمانی ریمانڈ منظور کیا جائے۔

عدالت نے فریقین کے دلائل سننے اور ورثا کے بیانِ حلفی کا جائزہ لینے کے بعد پولیس کی جسمانی ریمانڈ کی استدعا مسترد کر دی، جبکہ دونوں ملزمان فیاض احمد اور نعمان حسن کی 50، 50 ہزار روپے کے ضمانتی مچلکوں کے عوض ضمانت منظور کرتے ہوئے انہیں رہا کرنے کا حکم جاری کر دیا۔