ایم کیو ایم پہلے اپنے گھر کا قبلہ درست کرے، پھر استعفوں کی بات کرے: سعدیہ جاوید

ترجمان سندھ حکومت سعدیہ جاوید نے متحدہ قومی موومنٹ (ایم کیو ایم) کی قیادت کے مطالبات اور تنقید پر شدید جوابی ردعمل دیتے ہوئے کہا ہے کہ وفاقی وزارتوں کے مزے لوٹنے والے پہلے اپنے گھر کا قبلہ درست کریں اور اس کے بعد استعفوں کی بات کریں۔

کراچی سے جاری کردہ اپنے سخت بیان میں سعدیہ جاوید نے کہا کہ صوبے میں کراچی تا کشمور دھول نہیں بلکہ درحقیقت ایم کیو ایم کی اپنی سیاست کی پرانی گرد اڑ رہی ہے۔ انہوں نے ماضی کے ادوار کا حوالہ دیتے ہوئے تنقید کی کہ جو عناصر ماضی میں کراچی شہر کے ماسٹر پلان کے قاتل رہے ہیں، وہ آج سندھ حکومت کو ترقیاتی منصوبوں پر لیکچر دینے سے گریز کریں۔ ترجمان نے سوال اٹھایا کہ یونیورسٹی روڈ کی تعمیر کا رونا رونے والے ایم کیو ایم کے وفاقی وزراء عوام کو یہ بتائیں کہ انہوں نے وفاق سے کراچی کی ترقی کے لیے کتنے ارب روپے دلوائے ہیں؟

سعدیہ جاوید نے مزید کہا کہ نئے صوبوں کا راگ الاپنا ایم کیو ایم کے سیاسی دیوالیہ پن کی آخری قسط ثابت ہو گا، کیونکہ سندھ دھرتی کی تقسیم کے خواب دیکھنے والے خود آج درجنوں دھڑوں میں بٹ چکے ہیں۔ انہوں نے دوٹوک الفاظ میں کہا کہ پاکستان پیپلز پارٹی کو کسی سے خوفزدہ ہونے کی کوئی ضرورت نہیں، ایم کیو ایم کو دوسروں پر تنقید کے بجائے اپنے سکڑتے ہوئے ووٹ بینک کی فکر کرنی چاہیے۔

ترجمان سندھ حکومت نے سنگین الزام عائد کرتے ہوئے کہا کہ مصطفیٰ کمال کے دورِ نظامت کے 300 ارب روپے کا حساب آج تک کراچی میٹروپولیٹن کارپوریشن (کے ایم سی) کی فائلوں میں غائب ہے، اس لیے صبح شام پریس کانفرنسیں کرنے کا شوق پالنے والے رہنما اپنے حلقوں میں جا کر عوام کا سامنا کریں۔

اپنے بیان کے اختتام پر سعدیہ جاوید کا کہنا تھا کہ اقتدار کے ایوانوں میں بیٹھ کر بیک وقت اپوزیشن کا ڈرامہ رچانے کی ایم کیو ایم کی پرانی فلم اب مکمل طور پر فلاپ ہو چکی ہے اور عوام ان کی دوغلی سیاست کو بخوبی جان چکے ہیں۔