خیبرپختونخوا کے 12 مخصوص اضلاع میں جدید اینٹی ڈرون ٹیکنالوجی متعارف کرانے کا فیصلہ

خیبرپختونخوا کے مخصوص 12 اضلاع کو ڈرون حملوں اور فضائی خطرات سے محفوظ بنانے کے لیے جدید ترین اینٹی ڈرون ٹیکنالوجی متعارف کرانے کا اہم فیصلہ کیا گیا ہے، اور اس اہم دفاعی منصوبے پر 10 ارب روپے سے زائد کےاقتصادی فنڈز خرچ کیے جائیں گے۔

مشیر اطلاعات برائے مخصوص اضلاع محمود جان بابر کے مطابق یہ جدید ترین ٹیکنالوجی کسی بھی مشکوک ڈرون کی بروقت شناخت کرنے اور اسے فضا میں ہی ناکارہ بنانے یا گرانے کی مکمل صلاحیت رکھتی ہے۔ انہوں نے واضح کیا کہ جیسے ہی کوئی غیر مجاز ڈرون ان 12 حساس اضلاع کی فضائی حدود میں داخل ہوگا، یہ جدید دفاعی ٹیکنالوجی خود بخود متحرک ہو جائے گی۔

محمود جان بابر نے بتایا کہ یہ جدید اینٹی ڈرون ٹیکنالوجی ایک مضبوط اور ناقابلِ تسخیر شیلڈ کی طرح ان مخصوص اضلاع کو تمام تر ڈرون خطرات سے مؤثر تحفظ فراہم کرے گی۔ ان کا کہنا تھا کہ موجودہ سکیورٹی چیلنجز کے پیش نظر ڈرون حملوں کو روکنے کے لیے اس قسم کی جدید ٹیکنالوجی کا نفاذ وقت کی اہم ترین ضرورت بن چکا ہے۔

مشیر اطلاعات نے مزید تفصیلات بتاتے ہوئے کہا کہ مجموعی طور پر مختص کردہ 70 ارب روپے کے فنڈز میں سے 60 ارب روپے صوبائی پولیس کی صلاحیتوں کو بڑھانے کے لیے رکھے گئے ہیں، جبکہ 12 مخصوص اضلاع کے کاؤنٹر ٹیررازم ڈیپارٹمنٹ (سی ٹی ڈی) کو اس جدید اینٹی ڈرون ٹیکنالوجی اور سازوسامان کی فراہمی کے لیے 10 ارب روپے سے زائد کے خصوصی فنڈز جاری کیے جائیں گے۔