ذیابیطس کا تیزی سے پھیلاؤ صحتِ عامہ کا سنگین مسئلہ بنتا جا رہا ہے، وزیراعظم

وزیراعظم محمد شہباز شریف نے ذیابیطس کے عالمی دن کے موقع پر اپنے خصوصی پیغام میں کہا ہے کہ پاکستان میں ذیابیطس کا تیزی سے پھیلاؤ صحتِ عامہ کا ایک سنگین مسئلہ بنتا جا رہا ہے، اس لیے اس موذی مرض کی پیچیدگیوں سے بچاؤ اور قیمتی انسانی جانوں کے مؤثر تحفظ کے لیے بروقت اسکریننگ اور فوری طبی مداخلت ناگزیر ہے۔

عالمی یومِ ذیابیطس (14 نومبر 2026ء) کے موقع پر اپنے پیغام میں وزیراعظم نے کہا کہ پاکستان اس عالمی دن کی مناسبت سے بین الاقوامی برادری کے ساتھ مل کر ذیابیطس کی روک تھام کے لیے مشترکہ مؤثر اقدامات اور باہمی تعاون کی اہمیت پر زور دیتا ہے۔ انہوں نے اجاگر کیا کہ اس سال ذیابیطس کا عالمی دن ’’ذیابیطس کے خلاف بروقت اقدامات‘‘ کے عنوان کے تحت منایا جا رہا ہے، جو اس بیماری کے منفی اثرات سے بچنے کے لیے ابتدائی مرحلے میں اسکریننگ اور معیاری طبی علاج کی اہمیت کو اجاگر کرتا ہے۔

وزیراعظم کے مطابق ذیابیطس اس وقت دنیا بھر میں صحتِ عامہ کا ایک بڑا چیلنج بنا ہوا ہے جس کی لپیٹ میں لاکھوں افراد آ چکے ہیں، اور پاکستان میں بھی اس مرض کے پھیلاؤ کو سختی سے روکنے کے لیے بروقت تشخیص اور علاج کی سہولیات تک عام آدمی کی رسائی کو یقینی بنانا حکومت کی اولین ترجیح ہے۔

شہباز شریف نے اہم اعلان کرتے ہوئے بتایا کہ ملک میں ذیابیطس کی مؤثر روک تھام اور اس پر کنٹرول کے لیے خصوصی طور پر ’’وزیراعظم ذیابیطس روک تھام اور کنٹرول پروگرام‘‘ مرتب کیا گیا ہے، جس کے تحت وفاقی حکومت نے 6.8 ارب روپے کے فنڈز مختص کیے ہیں۔ انہوں نے وضاحت کی کہ اس جامع پروگرام کا بنیادی مقصد ابتدائی مرحلے میں ہی ذیابیطس کی درست تشخیص کے لیے اسکریننگ کا دائرہ کار ملک بھر میں وسیع کرنا، بنیادی طبی مراکز پر سہولیات کو بہتر بنانا اور تشخیص و علاج تک عوام کی آسان رسائی بڑھانا ہے۔

وزیراعظم نے مزید بتایا کہ اس قومی عزم کے تحت صحت مند طرزِ زندگی کے فروغ، عوامی سطح پر آگاہی مہم چلانے اور وفاقی و صوبائی حکومتوں کے درمیان مؤثر اشتراکِ عمل کو بھی بھرپور ترجیح دی جا رہی ہے۔

اپنے پیغام کے آخر میں وزیراعظم نے تمام شہریوں پر پرزور اپیل کی کہ وہ صحت مند طرزِ زندگی اپنائیں، متوازن اور غذائیت سے بھرپور غذا کا استعمال کریں، روزانہ ورزش کو اپنے معمول کا حصہ بنائیں اور باقاعدگی سے اپنا طبی معائنہ اور شوگر اسکریننگ کروائیں۔ انہوں نے شہریوں سے یہ بھی اپیل کی کہ کسی بھی علامت کی صورت میں فوری طور پر کسی مستند معالج یا ڈاکٹر سے طبی مشورہ لیں۔