روس، یوکرین مذاکرات میں یورپی ممالک کی شمولیت ضروری ہے: کایا کالاس

یورپی یونین کی خارجہ پالیسی کی سربراہ کایا کالاس (Kaja Kallas) نے کہا ہے کہ روس اور یوکرین کے درمیان جاری امن مذاکرات میں یورپی ممالک کی براہِ راست شمولیت ناگزیر ہے، اور یورپ کو نہ صرف مذاکراتی عمل بلکہ اس سے جڑے اہم فیصلوں میں بھی مؤثر اور فیصلہ کن کردار ملنا چاہیے۔

غیر ملکی میڈیا سے گفتگو کرتے ہوئے یورپی یونین کی اعلیٰ نمائندہ برائے خارجہ امور و سکیورٹی پالیسی کایا کالاس نے ماسکو کی مذاکراتی حکمتِ عملی پر کڑی تنقید کی۔ ان کا کہنا تھا کہ روس اپنے زیادہ سے زیادہ مطالبات منوانے کے لیے دباؤ، دھمکیوں اور الٹی میٹم کا راستہ اختیار کرتا ہے، اور مغربی ممالک کی جانب سے دی جانے والی ہر رعایت کے بعد روس اپنے مطالبات میں مزید اضافہ کر دیتا ہے۔

کایا کالاس نے الزام عائد کیا کہ روس مذاکرات کی میز پر مخالف فریق کو کمزور پوزیشن میں دیکھنا چاہتا ہے تاکہ یکطرفہ طور پر اپنی شرائط مسلط کر سکے۔ انہوں نے واضح کیا کہ یورپی سلامتی کے مستقبل سے جڑے کسی بھی معاہدے کو یورپ کی شمولیت کے بغیر حتمی شکل نہیں دی جا سکتی۔

اپنے منصب اور سفارتی کردار کے حوالے سے گفتگو کرتے ہوئے کایا کالاس نے بتایا کہ یورپی یونین کے تمام رکن ممالک نے خارجہ اور سکیورٹی امور میں ان کی قیادت اور نمائندگی کی مکمل حمایت کی ہے۔ انہوں نے دوٹوک الفاظ میں کہا کہ روس انہیں یورپ کی نمائندہ کے طور پر نہیں دیکھنا چاہتا، تاہم یہ فیصلہ کرنا ماسکو کے اختیار میں ہرگز نہیں ہے کہ عالمی سطح پر یورپ کی نمائندگی کون کرے گا۔