نیتن یاہو کی ایران کیخلاف دوبارہ جنگ شروع کرنے کیلئے ٹرمپ پر دباؤ ڈالنے کی کوششیں

امریکی نیوز ویب سائٹ ’ایگزیوس‘ (Axios) کی ایک رپورٹ کے مطابق اسرائیلی وزیراعظم بینجمن نیتن یاہو نے ایران کے خلاف دوبارہ فوجی کارروائی اور جنگ شروع کرنے کے لیے امریکی صدر ڈونلڈ ٹرمپ پر دباؤ ڈالنے کی کوششیں تیز کر دی ہیں، جبکہ اسی سلسلے میں اسرائیلی خفیہ ایجنسی ’موساد‘ کے سربراہ رومن گوفمین ٹرمپ انتظامیہ کے اعلیٰ حکام سے مشاورت کے لیے واشنگٹن پہنچ گئے ہیں۔

امریکی نیوز ویب سائٹ نے باخبر ذرائع کے حوالے سے بتایا ہے کہ موساد کے سربراہ رومن گوفمین امریکا کے دورے کے دوران سینٹرل انٹیلی جنس ایجنسی (سی آئی اے) کے ڈائریکٹر جان ریٹکلف سے اہم ملاقات کر رہے ہیں، جبکہ وائٹ ہاؤس کے خصوصی نمائندے اسٹیو وٹکوف سے ملاقات کے لیے ان کے میامی جانے کا بھی امکان ہے۔ تاہم اس پیش رفت کے حوالے سے موساد، سی آئی اے اور وائٹ ہاؤس کی جانب سے تاحال کوئی باضابطہ تبصرہ سامنے نہیں آیا ہے۔

رپورٹ میں ایک امریکی عہدیدار کے حوالے سے بتایا گیا ہے کہ صدر ڈونلڈ ٹرمپ اب تک ایران کے خلاف جنگ دوبارہ شروع کرنے سے متعلق نیتن یاہو کے دباؤ کو مسترد کرتے آئے ہیں۔ دونوں رہنماؤں کے درمیان 5 نومبر کو ایک ٹیلی فونک رابطہ بھی ہوا تھا جس میں ایران کی مجموعی صورتِ حال پر تفصیلی تبادلہ خیال کیا گیا، تاہم صدر ٹرمپ نے نئی براہِ راست فوجی کارروائی کے بجائے ایران کے خلاف بحری ناکا بندی اور سخت اقتصادی دباؤ جاری رکھنے کی پالیسی کی حمایت کی ہے۔

دوسری جانب اسرائیل کی داخلی سیاسی صورتِ حال کے تناظر میں رپورٹ میں کہا گیا ہے کہ 27 اکتوبر کو ہونے والے اسرائیلی انتخابات کے بعد بینجمن نیتن یاہو پارلیمنٹ میں اپنی اکثریت کھو چکے ہیں اور ان کے سیاسی حریف گادی آئزنکوٹ کو نئی حکومت بنانے کا مینڈیٹ مل چکا ہے، تاہم ابھی یہ واضح نہیں کہ آیا وہ حکومت تشکیل دینے میں کامیاب ہو سکیں گے یا نہیں۔ ذرائع کے مطابق اسرائیلی اپوزیشن رہنماؤں کو شدید خدشہ ہے کہ نیتن یاہو، گادی آئزنکوٹ کی حکومت سازی کی کوششوں کو سبوتاژ کرنے اور اپنا اقتدار برقرار رکھنے کے لیے ایران پر حملہ کرنے یا تہران کو اسرائیل پر جوابی حملے کے لیے اکسانے کی کوشش کر سکتے ہیں۔

رپورٹ میں مزید انکشاف کیا گیا ہے کہ گزشتہ روز نیتن یاہو نے گادی آئزنکوٹ سے دو گھنٹے طویل ملاقات کی اور انہیں ایران کی موجودہ سکیورٹی صورتِ حال پر بریفنگ دی۔ تاہم آئزنکوٹ کے قریبی ذرائع کے مطابق ان کا مؤقف ہے کہ خطے کے موجودہ حالات ایران کے خلاف کسی فوری فوجی کارروائی کا تقاضا نہیں کرتے