معدنی وسائل کو قومی ترقی اور معاشی خوشحالی میں تبدیل کرنا ہوگا: فیلڈ مارشل

چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان کی معدنی دولت کو کارآمد بنانا ہمارا اجتماعی قومی مقصد ہے اور ملک کے قیمتی معدنی وسائل کو قومی ترقی اور معاشی خوشحالی میں تبدیل کرنے کے لیے ایک مربوط حکمت عملی اپنانا ناگزیر ہے۔ وفاقی دارالحکومت میں جاری منرلز انویسٹمنٹ فورم سے خطاب کرتے ہوئے انہوں نے زور دیا کہ خام مال برآمد کرنے کے بجائے ریفائننگ، پروسیسنگ اور مینوفیکچرنگ سمیت مکمل ویلیو چین کی ترقی پر توجہ دی جانی چاہیے تاکہ صنعتی سرگرمیوں، سرمایہ کاری اور روزگار کے نئے مواقع پیدا ہوں۔ فیلڈ مارشل سید عاصم منیر نے اس بات پر بھی روشنی ڈالی کہ معدنی ترقی کا حقیقی فائدہ اسی وقت ممکن ہے جب اس کے ثمرات معدنیات سے مالا مال علاقوں کی مقامی آبادیوں تک براہِ راست پہنچیں اور ان کی زندگیوں میں ٹھوس بہتری آئے، جبکہ پاکستان ایسی طویل المدتی بین الاقوامی شراکت داریوں کا خواہاں ہے جو ملک اور شراکت داروں دونوں کے لیے پائیدار معاشی قدر کا باعث بنیں۔ انہوں نے پاکستانی عوام کی صلاحیتوں اور عزم کو سراہتے ہوئے عزم ظاہر کیا کہ اب ملک کو خام معدنیات کی برآمد سے نکال کر ویلیو ایڈڈ معاشی ترقی کی راہ پر گامزن کرنا ہوگا۔