پاکستان میں گڈ گورننس اور ترقی کیلئے 77 فیصد شہری نئے صوبوں کے حامی

ایک نئے قومی سروے میں انکشاف ہوا ہے کہ پاکستان میں بہتر حکمرانی، ترقیاتی عمل کی رفتار تیز کرنے اور سرکاری خدمات عوام کی دہلیز تک پہنچانے کے لیے نئے صوبوں کے قیام کے حامی شہریوں کی تعداد میں نمایاں اضافہ ہو رہا ہے، کیونکہ بڑے صوبائی انتظامی ڈھانچے دور دراز اضلاع کی ضروریات پوری کرنے میں مشکلات کا شکار ہیں۔ میریڈین اینالیٹکس کی جانب سے 5 ہزار شہریوں کے درمیان کیے گئے ’’میریڈین نیشنل بیرومیٹر 2026‘‘ کے نام سے اس سروے کے مطابق 77 فیصد پاکستانی اضافی صوبوں کے قیام کی پرزور حمایت کرتے ہیں، جبکہ نومبر 2022ء کے مقابلے میں اس شرح میں 23 فیصد پوائنٹس کا بڑا اضافہ ریکارڈ کیا گیا ہے۔ سروے کے اعدادوشمار کے مطابق 2022ء میں نئے صوبوں کے قیام کی حمایت کی شرح 54 فیصد تھی جو 2024ء میں بڑھ کر 66 فیصد ہو گئی تھی اور تازہ ترین سروے میں یہ بڑھ کر 77 فیصد کی سطح پر پہنچ گئی ہے۔