صوبوں پر ریفرنڈم ہو بھی جائے تو معاملہ پارلیمنٹ نے طے کرنا ہے: رانا ثنا اللہ

وزیراعظم کے مشیر برائے سیاسی امور رانا ثنا اللہ نے کہا ہے کہ نئے صوبوں کے قیام کے معاملے پر اگر ریفرنڈم کرا بھی لیا جائے تب بھی یہ معاملہ حتمی طور پر پارلیمنٹ نے ہی طے کرنا ہے، اور تاحال یہ موضوع پارلیمنٹ میں زیرِ بحث آیا ہی نہیں ہے۔ ایک نجی ٹی وی سے گفتگو کرتے ہوئے رانا ثنا اللہ کا کہنا تھا کہ ریفرنڈم کرانے کا اختیار بھی پارلیمنٹ کے پاس ہے اور جب یہ معاملہ ایوان میں آئے گا تو اس پر باقاعدہ پالیسی اسٹیٹمنٹ دی جائے گی اور تفصیلی بحث ہوگی۔ بانی پی ٹی آئی عمران خان سے ان کے وکلا کی ملاقات کے حوالے سے گفتگو کرتے ہوئے انہوں نے کہا کہ عمران خان کے دونوں وکلا نے ان سے ملاقات کی ہے اور اب آئندہ دنوں میں ان کے رویے کا اندازہ ہوگا، تاہم وکلا نے ملاقات کے بعد باہر آ کر سیاسی گفتگو کی جو اگلی ملاقاتوں کی راہ میں رکاوٹ بن سکتی ہے۔ رانا ثنا اللہ نے واضح کیا کہ پی ٹی آئی کی جانب سے لانگ مارچ کی کال کے تناظر میں انہیں سمجھانے کی کوشش کی گئی اور ہر طرح کی یقین دہانی کرائی گئی، جبکہ ماضی میں ملاقاتوں پر پابندی اس لیے عائد کی گئی تھی کہ ان ملاقاتوں کو سیاسی مقاصد کے لیے استعمال کیا جاتا تھا۔