تھرپارکر اور عمرکوٹ کے 25 صحرائی دیہات آفت زدہ قرار

سندھ حکومت نے شدید خشک سالی اور زرعی نقصانات کے پیشِ نظر تھرپارکر اور عمرکوٹ کے 25 صحرائی دیہاتوں کو مالی سال 2026-27 کے لیے باضابطہ طور پر آفت زدہ قرار دے دیا ہے۔

محکمہ ریلیف و بحالی کے مطابق مون سون کے موسم کے دوران غیر معمولی اور غیر مساوی بارشوں کے باعث ان صحرائی علاقوں میں خشک سالی کی سنگین صورتحال پیدا ہو گئی ہے، جس کے نتیجے میں بارانی فصلیں بری طرح تباہ ہو گئیں اور مقامی مویشیوں کے لیے چارے کی شدید قلت پیدا ہو گئی ہے۔

حکام کا کہنا ہے کہ خشک سالی کی وجہ سے متاثرہ دیہاتوں میں زراعت اور مویشی پالنے کے شعبے سے وابستہ مقامی آبادی کو شدید معاشی اور معاشرتی مشکلات کا سامنا ہے، اور ان علاقوں کو آفت زدہ قرار دینے کا بنیادی مقصد متاثرین کو بروقت سرکاری ریلیف اور مالی معاونت فراہم کرنا ہے۔ دوسری جانب جاری کردہ نوٹیفکیشن کے تحت ضلع تھرپارکر کے تعلقہ کالوئی کے 9 نہری دیہاتوں کو آفت زدہ قرار دینے کے فیصلے سے مستثنیٰ رکھا گیا ہے۔