گلگت سے یاسین جانے والی گاڑی دریا میں جاگری، 10 مسافر جاں بحق، 3 زخمی

گلگت سے یاسین جانے والی ایک مسافر گاڑی خوفناک حادثے کا شکار ہو کر دریا میں جا گری، جس کے نتیجے میں 10 مسافر جاں بحق جبکہ 3 شدید زخمی ہو گئے۔

ریسکیو ذرائع کے مطابق یہ افسوسناک حادثہ مورکہ یاسین کے مقام پر پیش آیا، جہاں مسافر گاڑی بے قابو ہو کر گہرے دریا میں جا گری۔ حادثے کی اطلاع ملتے ہی مقامی رضاکار اور ریسکیو ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کرتے ہوئے جاں بحق افراد کی لاشوں اور زخمی مسافروں کو دریا سے باہر نکال کر قریبی ہسپتال منتقل کیا۔

دوسری جانب وزیراعلیٰ گلگت بلتستان نے اس اندوہناک ٹریفک حادثے میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ انہوں نے جاں بحق افراد کے لواحقین سے دلی تعزیت اور ہمدردی کا اظہار کرتے ہوئے متعلقہ حکام کو زخمیوں کو بہترین اور فوری طبی سہولیات فراہم کرنے کی ہدایت جاری کر دی ہے۔