ملکی سیاست میں ’’ری سیٹ‘‘ کی گونج، صدر مملکت سے محسن نقوی کی اہم ملاقات

ملکی سیاست میں ’’ری سیٹ‘‘ کی گونج کے درمیان وفاقی وزیر داخلہ محسن نقوی نے نوابشاہ میں صدر مملکت آصف علی زرداری سے اہم ملاقات کی ہے۔

ذرائع کے مطابق صدر مملکت آصف علی زرداری اور وفاقی وزیر داخلہ محسن نقوی کے درمیان ہونے والی اس اہم نشست کے دوران ملک میں نئے انتظامی یونٹس کے قیام اور ممکنہ 28ویں آئینی ترمیم کے معاملے پر تفصیلی تبادلہ خیال کیا گیا۔ ملاقات میں بانی پی ٹی آئی کی وکلا سے ہونے والی حالیہ ملاقات، ان کی بہنوں کی رہائی اور اس کے ملکی سیاست پر مرتب ہونے والے اثرات پر بھی گفتگو کی گئی، جس پر صدر مملکت آصف علی زرداری نے اپوزیشن جماعتوں کے ساتھ معاملات کے پائیدار حل کے لیے سیاسی مذاکرات پر زور دیا۔

علاوہ ازیں ملاقات کے دوران خیبرپختونخوا کی موجودہ سیاسی صورتحال اور صوبے میں امن و امان کی مجموعی فضا بھی تفصیلی طور پر زیر بحث آئی، جبکہ ملک کی مجموعی معاشی و سیاسی صورتحال اور دیگر اہم قومی امور پر بھی مشاورت کی گئی۔ وفاقی وزیر داخلہ محسن نقوی نے صدر آصف علی زرداری کو ملک بھر میں قیامِ امن اور سکیورٹی سے متعلق کیے جانے والے اقدامات سے آگاہ کیا۔ سیاسی حلقوں کی جانب سے ملک میں ’’ری سیٹ‘‘ سے متعلق حالیہ بیانات کے تناظر میں اس ملاقات کو غیر معمولی اہمیت کا حامل قرار دیا جا رہا ہے۔