ایرانی وارننگ نظرانداز کرنے پر دو آئل ٹینکرز میں دھماکے اور آتشزدگی کا دعویٰ

ایرانی پاسدارانِ انقلاب (IRGC) نے دعویٰ کیا ہے کہ گزشتہ رات آبنائے ہرمز میں دو دیوہیکل آئل سپر ٹینکرز میں زوردار دھماکوں کے بعد شدید آگ بھڑک اٹھی، جبکہ ان دونوں بحری جہازوں پر مجموعی طور پر 40 لاکھ بیرل سے زائد خام تیل لدا ہوا تھا۔

ایرانی پاسدارانِ انقلاب کی جانب سے جاری بیان کے مطابق دونوں آئل ٹینکرز آبنائے ہرمز کے ایک غیر مجاز راستے سے گزرنے کی کوشش کر رہے تھے اور انہوں نے ایرانی بحری حکام کی جانب سے متعدد بار دی گئی وارننگز کو یکسر نظرانداز کر دیا تھا۔ پاسداران کا کہنا ہے کہ دونوں جہازوں کو پہلے ہی واضح طور پر خبردار کیا گیا تھا کہ آبنائے ہرمز کا جنوبی راستہ انتہائی غیر محفوظ ہے، تاہم انہوں نے امریکی فوج کے مبینہ تعاون پر بھروسا کرتے ہوئے اس ممنوعہ راستے سے گزرنے کی کوشش کی۔

ایرانی پاسدارانِ انقلاب نے اس واقعے کے بعد سخت دھمکی دیتے ہوئے کہا ہے کہ امریکی عسکری تعاون کے سہارے آبنائے ہرمز کے جنوبی راستے سے گزرنے کی کوشش کرنے والے دیگر بحری جہازوں کا بھی یہی انجام ہوگا۔