پاکستان تحریکِ انصاف (پی ٹی آئی) نے معروف قانون دان نیاز اللہ خان نیازی کو انصاف لائرز فورم (ILF) پاکستان کا نیا چیف آرگنائزر مقرر کر دیا ہے، جس کا باضابطہ نوٹیفکیشن بھی جاری کر دیا گیا ہے۔ نیاز اللہ خان نیازی اس وقت بانی پی ٹی آئی عمران خان اور بشریٰ بی بی کے ترجمان کی ذمہ داریاں بھی انجام دے رہے ہیں۔ تقرری کے موقع پر چیئرمین پی ٹی آئی بیرسٹر گوہر علی خان نے نیاز اللہ نیازی کی پارٹی کے لیے گراں قدر خدمات، محنت اور وابستگی کو خراجِ تحسین پیش کرتے ہوئے انہیں نئی ذمہ داریاں سنبھالنے پر دلی مبارکباد دی۔ بیرسٹر گوہر نے نیک خواہشات کا اظہار کرتے ہوئے کہا کہ امید ہے نیاز اللہ نیازی کی قیادت میں انصاف لائرز فورم مزید مضبوط، متحد اور پیشہ ورانہ بنیادوں پر منظم ہوگا اور آزاد عدلیہ، قانون کی حکمرانی اور عدالتی اصلاحات کے حوالے سے پی ٹی آئی کے وژن کو عملی جامہ پہنانے میں بھرپور کردار ادا کرے گا۔