صوبائی حکومتوں کی عالمی سرمایہ کاروں کو معدنی شعبے میں سرمایہ کاری کی دعوت

اسلام آباد کے جناح کنونشن سینٹر میں منعقدہ ’پاکستان منرلز انویسٹمنٹ فورم 2026‘ کے دوران 50 سے زائد ممالک کے 5 ہزار سے زائد مندوبین سے خطاب کرتے ہوئے چاروں صوبوں، آزاد کشمیر اور گلگت بلتستان کی قیادت نے عالمی سرمایہ کاروں کو معدنیات کے شعبے میں سرمایہ کاری کی دعوت اور ہر ممکن تعاون کی یقین دہانی کرائی ہے۔ تقریب میں وزیراعلیٰ پنجاب مریم نواز نے پنجاب کے دریاؤں میں خالص سونے، کوئلے اور پنک سالٹ کے وافر ذخائر کا ذکر کرتے ہوئے سستے نرخوں پر زمین کی فراہمی کا اعلان کیا، جبکہ وزیراعلیٰ سندھ مراد علی شاہ نے تھر کے کوئلے کے ذخائر اور جدید ٹیکنالوجی کی منتقلی کے مواقع اجاگر کیے۔ وزیراعلیٰ بلوچستان سرفراز بگٹی نے سرمایہ کاروں کے تحفظ کے لیے منرل کوریڈور کی الگ سکیورٹی ڈویژن کے قیام سے آگاہ کیا، گورنر خیبرپختونخوا فیصل کریم کنڈی نے ون ونڈو آپریشن اور سکیورٹی کی فراہمی کا عزم دہرایا، جبکہ وزیراعظم آزاد کشمیر سید افتخار گیلانی نے قیمتی پتھروں، باکسائٹ اور سیمنٹ کے شعبوں میں سرمایہ کاری کے لیے قوانین کی ہم آہنگی پر زور دیا۔