گلگت بلتستان کی ترقی کیلئے وفاقی حکومت ہر ممکن تعاون کرے گی: محسن نقوی

وفاقی وزیر داخلہ محسن نقوی سے اسلام آباد میں وزیراعلیٰ گلگت بلتستان امجد حسین نے ملاقات کی، جس میں خطے کی مجموعی صورتحال، امن و امان اور باہمی دلچسپی کے امور پر تفصیلی تبادلہ خیال کیا گیا۔ اس موقع پر وفاقی وزیر داخلہ محسن نقوی نے کہا کہ گلگت بلتستان میں ترقی، امن و استحکام اور سیاحت کے فروغ کے لیے وفاقی حکومت ہر ممکن تعاون فراہم کرے گی، جبکہ خطے میں حکومتی کاوشیں قابلِ تحسین ہیں۔ انہوں نے مزید کہا کہ گلگت بلتستان آنے والے سیاحوں کی تعداد میں نمایاں اضافہ ہوا ہے، جس سے مقامی معیشت مستحکم اور روزگار کے نئے مواقع پیدا ہوں گے۔ ملاقات کے دوران وزیراعلیٰ امجد حسین نے وزیر داخلہ کو آگاہ کیا کہ گلگت بلتستان میں اس وقت مجموعی صورتحال بہتر اور ماحول مکمل طور پر پرامن ہے۔