ڈریپ کا طبی آلات کی نگرانی کے لیے میڈیکل ڈیوائسز بورڈ تشکیل

ڈرگ ریگولیٹری اتھارٹی آف پاکستان (ڈریپ) نے ملک بھر میں طبی آلات کے معیار، حفاظت اور افادیت کو یقینی بنانے اور ان کی سخت نگرانی کے لیے میڈیکل ڈیوائسز بورڈ کی باضابطہ تشکیل کر دی ہے۔

ڈریپ کی جانب سے جاری کردہ نوٹیفکیشن کے مطابق طبی آلات بورڈ کے 10 نئے ارکان کی تقرری دو سال کی مدت کے لیے کی گئی ہے۔ بورڈ میں اسلام آباد، کراچی، لاہور، کوئٹہ، پشاور، ایبٹ آباد، وزیرآباد اور راولپنڈی کے مختلف طبی اداروں، جامعات اور ہسپتالوں سے تعلق رکھنے والے نامور ماہرین کو شامل کیا گیا ہے تاکہ میڈیکل ڈیوائسز سے متعلق امور کی مؤثر طریقے سے دیکھ بھال کی جا سکے۔

نئے مقرر ہونے والے ارکان میں ڈاکٹر حیات محمد کاکڑ، ڈاکٹر عمیر اکرام، ڈاکٹر عبدالعلیم، وجاہت علی، ڈاکٹر عمارہ ہارون درانی، عطاالرحمان، ڈاکٹر شاہد حسین، ڈاکٹر فیصل شہزاد، عائشہ علی اور ڈاکٹر ردا خان شامل ہیں۔ یہ بورڈ ملک میں طبی آلات کی رجسٹریشن، معیار کی جانچ اور سیکیورٹی پروٹوکولز کی نگرانی کے فرائض سرانجام دے گا۔