اسحاق ڈار سے امریکہ کی سابق معاون وزیر خارجہ کی ملاقات، دوطرفہ تعاون پر گفتگو

جنوبی ایشیائی امور کے لیے امریکا کی سابق معاون وزیر خارجہ رابن ریفیل نے اسلام آباد میں نائب وزیراعظم و وزیر خارجہ سینیٹر اسحاق ڈار سے ملاقات کی، جس میں پاکستان اور امریکا کے دوطرفہ تعلقات اور باہمی دلچسپی کے امور پر تفصیلی تبادلہ خیال کیا گیا۔

دفتر خارجہ کے ترجمان کے مطابق، نائب وزیراعظم اسحاق ڈار نے پاکستان اور امریکا کے تعلقات میں جاری مثبت پیش رفت اور دوطرفہ تعاون کو مزید مضبوط بنانے کے لیے مسلسل اور اعلیٰ سطحی روابط کی اہمیت پر زور دیا۔ انہوں نے دونوں ممالک کے درمیان دیرینہ تعلقات کو مزید وسعت دینے کی خواہش کا اعادہ کیا۔

ملاقات کے دوران فریقین نے پاکستان اور امریکا کے ممتاز تھنک ٹینکس، فکری تنظیموں اور تعلیمی اداروں کے درمیان قریبی روابط، تعلیمی تبادلوں اور علمی شراکت داری کو فروغ دینے پر اتفاق کیا تاکہ عوام کے درمیان رابطوں کو مزید مستحکم بنایا جا سکے۔