نئے صوبوں کے مطالبے سے ہرگز دستبردار نہیں ہوں گا: مصطفیٰ کمال

متحدہ قومی موومنٹ (ایم کیو ایم) کے رہنما اور وفاقی وزیرِ صحت مصطفیٰ کمال نے واضح کیا ہے کہ وہ ملک میں نئے صوبوں کے قیام کے اپنے مطالبے سے کسی صورت پیچھے نہیں ہٹیں گے۔ اسلام آباد میں پریس کانفرنس کرتے ہوئے انہوں نے کہا کہ اگر کوئی سمجھتا ہے کہ وہ انہیں حق بات کہنے سے روک لے گا تو ایسا ممکن نہیں، کیونکہ ملک کو بحرانوں سے نکالنے اور بچانے کے لیے نئے صوبوں کی تشکیل لازمی اور ناگزیر ہو چکی ہے۔ ایم کیو ایم رہنما نے مزید کہا کہ وہ اپنی جماعت کو کمزور نہیں ہونے دیں گے اور اسے مزید فعال بنانے کی کوششیں جاری رکھیں گے۔ اپنے کردار پر بات کرتے ہوئے انہوں نے کہا کہ ان پر درجنوں الزامات لگائے جا سکتے ہیں لیکن کرپشن یا بے ایمانی کا کوئی الزام نہیں ثابت کیا جا سکتا، حالانکہ وہ ماضی میں ایسے عہدوں پر فائز رہے ہیں جہاں موقع تھا لیکن انہوں نے ہمیشہ شفافیت کو ترجیح دی۔