مکہ معاہدہ سعودیہ، ترکیہ کے ساتھ شراکت داری کی علامت، کسی کے خلاف نہیں: اسحاق ڈار

نائب وزیراعظم اور وزیر خارجہ اسحاق ڈار نے واضح کیا ہے کہ سعودی عرب اور ترکیہ کے ساتھ پاکستان کا ‘مکہ معاہدہ’ کسی بھی ملک کے خلاف نہیں بلکہ یہ خطے میں امن اور باہمی شراکت داری کی علامت ہے۔ اسلام آباد پالیسی ریسرچ انسٹی ٹیوٹ (IPRI) کے زیرِ اہتمام انعقاد پذیر ‘مارگلہ ڈائیلاگ’ میں ملکی و غیر ملکی ماہرین سے خطاب کرتے ہوئے اسحاق ڈار نے کہا کہ پاکستان بدلتی ہوئی عالمی صورتحال میں اپنے تمام بین الاقوامی شراکت داروں کے ساتھ تعلقات کو انتہائی اہمیت دیتا ہے، جبکہ چین کے ساتھ سٹریٹجک شراکت داری ملکی خارجہ پالیسی کا بنیادی ستون ہے۔ انہوں نے زور دیا کہ کسی بھی ملک کی سرزمین کسی دوسرے کے خلاف دہشت گردی کے لیے استعمال نہیں ہونی چاہیے۔ ان کا مزید کہنا تھا کہ عالمی سلامتی کا فریم ورک شدید دباؤ کا شکار ہے اور فوجی طاقت کا بے جا استعمال سفارتکاری کی گنجائش کو محدود کر رہا ہے، اس لیے اقوامِ متحدہ جیسے بین الاقوامی اداروں کو غیر منصفانہ رویوں سے ہٹ کر مؤثر کردار ادا کرنا ہوگا۔