بشریٰ بی بی کی بینائی متاثر ہوچکی ہے: وکیل کا دعویٰ

پاکستان تحریکِ انصاف کے بانی عمران خان اور ان کی اہلیہ بشریٰ بی بی کی 190 ملین پاؤنڈ کیس میں سزاؤں کے خلاف دائر اپیلوں پر اسلام آباد ہائیکورٹ کے چیف جسٹس سرفراز ڈوگر اور جسٹس محمد آصف پر مشتمل بینچ حتمی دلائل کی سماعت کر رہا ہے۔ سماعت سے قبل اڈیالہ جیل میں 40 منٹ کی ملاقات کے بعد وکیل سلمان صفدر نے عدالت میں تحریری جواب جمع کرایا ہے، جس میں دعویٰ کیا گیا ہے کہ بشریٰ بی بی کی بینائی شدید متاثر ہو چکی ہے اور وہ روشنی برداشت کرنے سے قاصر ہیں۔ وکیل کے مطابق بشریٰ بی بی کو ‘مچیور کیٹریکٹ’ کی تشخیص ہوئی ہے اور ڈاکٹروں نے 15 نومبر کے قریب ان کی آنکھ کا دوسرا آپریشن لازمی قرار دیا ہے۔ بانی پی ٹی آئی نے بھی اہلیہ کی صحت اور جیل میں صفائی کے ناقص معیار پر شدید تشویش کا اظہار کیا ہے، جبکہ وکلاء نے اپنے ذاتی معالجین سے معائنے اور علاج کے لیے عدالتی مداخلت کی استدعا کی ہے۔