حکومت اور جماعت اسلامی کی ذیلی کمیٹی کے مذاکرات کا فائنل راؤنڈ آج ہوگا

نائب امیر جماعت اسلامی پاکستان لیاقت بلوچ نے اعلان کیا ہے کہ حکومت اور جماعت اسلامی کی ذیلی کمیٹی کے درمیان مذاکرات کا حتمی و فائنل راؤنڈ آج منعقد ہو رہا ہے۔ اپنے ایک بیان میں لیاقت بلوچ نے بتایا کہ نائب وزیراعظم اسحاق ڈار کی میزبانی میں یہ اہم اجلاس وزارت خارجہ کے کمیٹی روم میں ہوگا، جس میں حکومت سے پٹرولیم لیوی کے خاتمے اور عوامی ریلیف کے لیے فوری اقدامات کا مطالبہ کیا جائے گا۔ انہوں نے کہا کہ مہنگا تیل، مہنگی بجلی، گیس اور ٹیکسوں کا بوجھ عوام کے لیے اب ناقابل برداشت ہو چکا ہے۔ لیاقت بلوچ کا مزید کہنا تھا کہ سرکاری محکموں میں کرپشن قومی معیشت کے لیے ایک بڑا روگ ہے، تاہم پٹرول پر لیوی اور گیس امپورٹ مافیا کے خاتمے سے معاشی پہیہ دوبارہ رواں دواں ہو سکتا ہے اور جماعت اسلامی کی عوام کو ریلیف دلانے کی جدوجہد جلد رنگ لائے گی۔