تربیلا سے دریائے سندھ میں اضافی پانی آج چھوڑے جانے کا امکان، مختلف اضلاع الرٹ

تربیلا ڈیم سے دریائے سندھ میں آج رات اضافی پانی چھوڑے جانے کے امکان کے پیشِ نظر آئندہ 24 گھنٹوں کے دوران اٹک اور ہری پور کے اضلاع کے لیے ہائی الرٹ جاری کر دیا گیا ہے۔ ضلعی انتظامیہ نے تحصیل حضرو اور چھچھ گاؤں سمیت دریائے سندھ کے قریبی علاقوں کے مکینوں کو مساجد میں اعلانات کے ذریعے اپنے مال مویشی اور سامان فوری طور پر محفوظ مقامات پر منتقل کرنے کی ہدایت کی ہے۔ واٹر اینڈ پاور ڈیولپمنٹ اتھارٹی (واپڈا) کے مطابق ڈیم میں پانی کی موجودہ سطح 1492 فٹ ہے جو کہ ڈیڈ لیول سے 90 فٹ بلند ہے، جبکہ ہنڈ کے مقام پر پانی کا بہاؤ ایک لاکھ 33 ہزار 737 کیوسک ریکارڈ کیا گیا۔ دوسری جانب واپڈا ترجمان نے تربیلا ڈیم کی ٹنل نمبر 5 منہدم ہونے کی افواہوں کو بے بنیاد قرار دیتے ہوئے واضح کیا کہ توسیعی منصوبے کی ٹنل میں کھدائی کے دوران چٹان کا ایک کمزور حصہ گرنے سے کچھ پانی اندر داخل ہوا تھا جسے مکمل طور پر نکال لیا گیا ہے اور تمام ملکی و غیر ملکی ورکرز محفوظ ہیں۔ فی الوقت توسیعی منصوبے پر کام عارضی طور پر روک دیا گیا ہے، جبکہ ڈیم کے 15 پاور یونٹس سے 656 میگاواٹ بجلی کی پیداوار جاری ہے۔