امریکا ایران تنازع حل کرنے کیلئے عالمی طاقتیں سر جوڑ کر بیٹھنے کو تیار

امریکہ اور ایران کے درمیان کشیدگی کے تدارک اور جنگ کے خاتمے کے لیے عالمی طاقتوں نے سفارتی کوششیں تیز کر دی ہیں، جبکہ امریکی صدر ڈونلڈ ٹرمپ نے ایران کے ساتھ معاہدے کے قریب پہنچنے کا دعویٰ کیا ہے۔ امریکی صدر کے مطابق وہ اگلے ہفتے چین میں منعقد ہونے والے ایشیا پیسیفک اکنامک کوآپریشن (APEC) کے سربراہی اجلاس کے موقع پر چینی صدر شی جن پنگ اور روسی صدر ولادیمیر پوتن سے ایران کے معاملے پر اہم گفتگو کے لیے پرامید ہیں۔ دوسری جانب امریکی نیوز ویب سائٹ ‘ایگزیوس’ کی رپورٹ کے مطابق قطر نے پاکستان، سعودی عرب، مصر اور ترکیہ کے ساتھ مل کر ایران امریکہ جنگ بندی کے لیے سفارت کاری تیز کر دی ہے۔ اس سلسلے میں صدر ٹرمپ آج قطری وزیراعظم عبدالرحمان آل ثانی سے ملاقات کر رہے ہیں جس میں نئی جنگ بندی اور جوہری مذاکرات کی بحالی پر بات چیت ہوگی، جبکہ قطری وزیراعظم کی امریکی نائب صدر جے ڈی وینس سے بھی الگ ملاقات متوقع ہے۔