اسلام آباد میں بلدیاتی انتخابات کیلئے کاغذات نامزدگی جمع کرانے کا مرحلہ مکمل

اسلام آباد میں بلدیاتی انتخابات کے لیے کاغذاتِ نامزدگی جمع کرانے کا مرحلہ مکمل ہو گیا ہے، جس کے تحت جنرل کونسلر کی 1,125 نشستوں کے لیے کل 3,505 امیدواروں نے اپنے کاغذات جمع کرائے ہیں۔ الیکشن کمیشن آف پاکستان کے جاری کردہ اعداد و شمار کے مطابق انتخابات کے لیے مجموعی طور پر 6,568 کاغذاتِ نامزدگی جاری کیے گئے تھے، جبکہ جنرل کونسلر کی نشستوں کے لیے 110 خواتین امیدواروں نے بھی اپنے کاغذات جمع کرائے ہیں۔ الیکشن کمیشن کے مطابق امیدواروں کی ابتدائی فہرست آج شائع کی جائے گی، جس کے بعد 11 سے 16 نومبر تک کاغذات کی جانچ پڑتال (اسکروٹنی) کا عمل جاری رہے گا۔ واضح رہے کہ وفاقی دارالحکومت میں بلدیاتی اداروں کی مدت فروری 2021ء میں ختم ہوئی تھی، اور اب تقریباً ساڑھے پانچ سال کے طویل وقفے کے بعد 20 دسمبر کو پولنگ انعقاد پذیر ہوگی۔