اڈیالہ جیل میں بانی پی ٹی آئی اور بشریٰ بی بی سے ملاقات: پی ٹی آئی نے 6 وکلاء رہنماؤں کی فہرست جیل حکام کو بھجوا دی

راولپنڈی کی اڈیالہ جیل میں بانی پی ٹی آئی اور ان کی اہلیہ بشریٰ بی بی سے منگل کے روز وکلاء کی مقررہ ملاقات کے سلسلے میں پاکستان تحریک انصاف (پی ٹی آئی) نے 6 وکلاء رہنماؤں کی فہرست جیل حکام کو ارسال کر دی ہے۔ بھجوائی گئی فہرست میں چیئرمین پی ٹی آئی بیرسٹر گوہر خان، نیاز اللہ نیازی، خالد یوسف چوہدری، راجہ مسعود الرحمان، جاوید شاہد اور تابش فاروق کے نام شامل ہیں۔ ذرائع کے مطابق یہ وکلاء رہنما منگل کے روز ملاقات کے لیے اڈیالہ جیل پہنچیں گے، جبکہ بشریٰ بی بی کے اہلخانہ کی آمد بھی متوقع ہے۔ دوسری جانب بانی پی ٹی آئی کی بہنیں اپنی نظربندی کے باعث اس بار ملاقات کے لیے اڈیالہ جیل نہیں آ سکیں گی۔