آزاد کشمیر پولیس کی چوکی پر فائرنگ میں زخمی سندھ رینجرز کے نائیک شہید

راولاکوٹ میں 5 نومبر کو کالعدم تنظیم کے مسلح شرپسندوں کی جانب سے آزاد جموں و کشمیر پولیس کی چوکی پر فائرنگ کے نتیجے میں شدید زخمی ہونے والے سندھ رینجرز کے نائیک بوستان خان زخموں کی تاب نہ لاتے ہوئے جامِ شہادت نوش کر گئے۔ آزاد کشمیر پولیس ترجمان کے مطابق شہید نائیک بوستان خان کا تعلق ضلع کوہاٹ سے تھا اور وہ خطے میں امن و امان کے قیام اور پولیس کی معاونت کے لیے ڈیوٹی پر مامور تھے۔ ترجمان نے واقعے کی شدید مذمت کرتے ہوئے کہا کہ عوامی حقوق کی آڑ میں قانون نافذ کرنے والے اداروں کو نشانہ بنانا کالعدم عناصر کے پُرتشدد رویے کا ثبوت ہے، تاہم ایسی بزدلانہ کارروائیاں سیکورٹی اداروں کے عزم کو متزلزل نہیں کر سکتیں۔ پولیس انتظامیہ نے شہید کے لواحقین سے دلی تعزیت کا اظہار کرتے ہوئے واضح کیا کہ حملے میں ملوث شرپسندوں کو ہر صورت قانون کے کٹہرے میں لایا جائے گا۔