خیبر میں پراسرار بیماری پھوٹ پڑی، ایک ہی خاندان کے پانچ بچے جاں بحق، دو زیرِ علاج

ضلع خیبر کی تحصیل لنڈی کوتل کے دور افتادہ علاقے قاضیانو کلے ذخہ خیل میں پراسرار بیماری پھیلنے سے ایک ہی خاندان کے 5 بچے جاں بحق ہو گئے ہیں، جبکہ 2 بچے تاحال حیات آباد میڈیکل کمپلیکس (HMC) پشاور میں زیرِ علاج ہیں۔ طبی ماہرین کے مطابق متاثرہ بچوں کے ابتدائی لیبارٹری ٹیسٹوں میں کیلشیم، میگنیشیم اور دیگر بنیادی اشاریے معمول کے مطابق پائے گئے ہیں، تاہم بیماری کی اصل وجوہات کا تعین کرنے کے لیے بلڈ کلچر اور سی ٹی اسکین برین جیسے پیچیدہ ٹیسٹ تجویز کیے گئے ہیں۔ ڈپٹی کمشنر خیبر کی ہدایت پر اسسٹنٹ کمشنر لنڈی کوتل نے HMC پشاور کا دورہ کر کے زیرِ علاج بچوں کی عیادت کی اور طبی سہولیات کا جائزہ لیا، جہاں ڈاکٹروں نے دونوں بچوں کی حالت کو مستحکم قرار دیا ہے۔ دوسری جانب ضلعی انتظامیہ نے متاثرہ گاؤں میں ہنگامی میڈیکل ٹیمیں روانہ کرنے کا فیصلہ کیا ہے تاکہ ممکنہ کیسز کی سکریننگ اور اموات کے محرکات کا سراغ لگایا جا سکے۔