ترکیہ ایران پر نئے حملوں کا آغاز نہیں دیکھنا چاہتا، صدر اردوان

ترک صدر رجب طیب اردوان نے امریکی صدر ڈونلڈ ٹرمپ کے ساتھ ٹیلی فونک گفتگو کے دوران ایران پر ممکنہ نئے حملوں کے حوالے سے اپنے شدید تحفظات اور تشویش سے آگاہ کیا ہے۔ انقرہ میں میڈیا سے گفتگو کرتے ہوئے صدر اردوان نے واضح کیا کہ ترکیہ خطے میں ایران کے خلاف حملوں کی نئی لہر کا آغاز نہیں دیکھنا چاہتا اور ان کا ملک تمام علاقائی تنازعات کو جنگ کے بجائے باہمی بات چیت اور سفارت کاری کے ذریعے حل کرنے پر زور دیتا ہے۔ انہوں نے افسوس کا اظہار کرتے ہوئے کہا کہ مشرقِ وسطیٰ کی صورتحال ایک بار پھر منفی سمت اختیار کرتی دکھائی دے رہی ہے، تاہم انقرہ اس تناؤ کو روکنے اور خطے کو مزید کشیدگی سے بچانے کے لیے اپنی تمام تر سفارتی کوششیں جاری رکھے گا۔