تربیلا ففتھ ایکسٹینشن پراجیکٹ کی ٹنل میں چٹان بیٹھنے سے پانی داخل: تمام ورکرز محفوظ، واپڈا نے ٹنل منہدم ہونے کی تردید کر دی

تربیلا ففتھ ایکسٹینشن (T5) ہائیڈرو پاور پراجیکٹ میں ٹنل کی کھدائی کے دوران سیکنڈ بینچ کنیکٹنگ ٹنل میں کمزور چٹانی ساخت اچانک بیٹھنے کے باعث انٹیک پٹ سے پانی ٹنل اور پاور ہاؤس کی جانب داخل ہو گیا۔ واقعے کے فوراً بعد ہنگامی کارروائی کرتے ہوئے تمام ورکرز کو بحفاظت باہر نکال لیا گیا اور واقعے میں کسی قسم کا جانی نقصان یا کوئی ورکر زخمی نہیں ہوا ہے۔ واپڈا حکام کے مطابق انٹیک پٹ سے آنے والے پانی کی مکمل نکاسی کر دی گئی ہے اور زیرِ تعمیر پاور ہاؤس سے بھی پانی نکالنے کا عمل جاری ہے، جبکہ منصوبے کے زیریں حصوں میں مزید پانی کے داخلے کو روک دیا گیا ہے۔ واٹر اینڈ پاور ڈویلپمنٹ اتھارٹی (واپڈا) نے سوشل میڈیا پر ٹنل کے منہدم ہونے کی خبروں کو سراسر بے بنیاد اور غلط قرار دیتے ہوئے واضح کیا ہے کہ مرکزی ٹنل، پاور ہاؤس، ٹیل ریس کلورٹ اور سوئچ یارڈ بالکل محفوظ ہیں، جبکہ سینئر انجینئرز صورتحال کا باریک بینی سے جائزہ لے رہے ہیں۔