مزارِ اقبال پر گارڈز تبدیلی کی پروقار تقریب، پاک بحریہ نے فرائض سنبھال لیے

یومِ اقبال کے موقع پر لاہور میں واقع مزارِ اقبال پر اعزازی گارڈز کی تبدیلی کی پروقار تقریب منعقد ہوئی، جہاں پاک بحریہ کے چاق و چوبند دستے نے پاکستان رینجرز سے مزار کی حفاظت کے فرائض سنبھال لیے۔ پاکستان نیوی کے اسٹیشن کمانڈر لاہور، کموڈور مصباح الامین نے تقریب کے مہمانِ خصوصی کے طور پر مزارِ اقبال پر پھول چڑھائے، فاتحہ خوانی کی اور مہمانوں کی کتاب میں اپنے تاثرات درج کیے۔ یومِ اقبال کی مناسبت سے اپنے خصوصی پیغام میں صدرِ مملکت آصف علی زرداری نے کہا کہ علامہ اقبالؒ کی شاعری نے برصغیر کے مسلمانوں کو اپنی جداگانہ شناخت، آزادی اور خودداری کے احساس سے روشناس کرایا۔ دوسری جانب وزیراعظم محمد شہباز شریف نے شاعرِ مشرق کو دلی خراجِ عقیدت پیش کرتے ہوئے اعلان کیا کہ حکومتِ پاکستان آج سے اگلے سال 9 نومبر تک علامہ اقبالؒ کی ولادت کی 150 ویں سالگرہ کے سلسلے میں سال بھر پر محیط قومی و بین الاقوامی کانفرنسوں، علمی مذاکروں اور ثقافتی سرگرمیوں کا انعقاد کرے گی تاکہ اقبالؒ کا فکری ورثہ نئی نسل تک منتقل ہو سکے۔