اقتدار ہاتھ سے نکلتا دیکھ کر نیتن یاہو ایک بار پھر مذہب کارڈ کھیلنے لگے

اسرائیلی وزیراعظم بنیامن نیتن یاہو نے سیاسی اقتدار خطرے میں دیکھ کر ایک بار پھر مذہبی اور قوم پرستانہ بیانیے کا سہارا لینا شروع کر دیا ہے۔ نیتن یاہو نے دعویٰ کیا ہے کہ اپوزیشن جماعتیں عرب اور اسلام پسند گروہوں کی حمایت سے نئی حکومت بنانے کی کوشش کر رہی ہیں، جو کہ ملکی سلامتی، دفاعی صلاحیت اور اسرائیل کے یہودی تشخص کے لیے شدید خطرہ ہے اور یہ اقدام اسرائیل کے وجود کو داؤ پر لگا سکتا ہے۔ انہوں نے صیہونی اور قومی جماعتوں سے متحد ہو کر حکومت بنانے کی اپیل کی، تاہم سابق عسکری سربراہ اور سیاسی رہنما آئزن کوٹ نے نیتن یاہو کے بیان کو محض سیاسی پراپیگنڈا قرار دیتے ہوئے مسترد کر دیا۔ آئزن کوٹ کا کہنا تھا کہ اسرائیل اب مزید سیاسی تعطل یا بار بار کے انتخابات کا متحمل نہیں ہو سکتا اور ملک کو ایک نئی قومی حکومت کی ضرورت ہے، جبکہ قومی اتحاد کی ان کوششوں میں رکاوٹ ڈالنے والوں کو تاریخ کبھی اچھے الفاظ میں یاد نہیں رکھے گی۔