وزیراعلیٰ پنجاب مریم نواز کی دیوالی کے تہوار پر ہندو برادری کو مبارکباد

وزیراعلیٰ پنجاب مریم نواز شریف نے دیوالی کے تہوار کے موقع پر پاکستان اور دنیا بھر میں مقیم ہندو برادری کو مبارکباد پیش کرتے ہوئے وطنِ عزیز کی ترقی و خوشحالی میں ان کے کردار کو خراجِ تحسین پیش کیا ہے۔ اپنے بیان میں وزیراعلیٰ پنجاب نے کہا کہ دیوالی کا دیپ محبت کی جوت جگاتا ہے اور حکومت قائد اعظم محمد علی جناحؒ کے افکار کی روشنی میں اقلیتوں کے حقوق، آزادی اور زندگی کے ہر شعبے میں ان کے جائز حصے کا تحفظ یقینی بنانے کے لیے پرعزم ہے۔ انہوں نے پنجاب میں اقلیتی برادریوں کے فلاحی اقدامات کا ذکر کرتے ہوئے بتایا کہ صوبے میں اقلیتی خاندانوں کی مالی معاونت کے لیے خصوصی ’مینارٹی کارڈ‘ اور سیکیورٹی کے لیے ’مینارٹی ورچوئل پولیس اسٹیشن‘ قائم کیے گئے ہیں۔ علاوہ ازیں، مریم نواز نے پنجاب کو پہلا سکھ میرج ایکٹ منظور کرنے کا اعزاز ملنے اور زیرِ التوا ہندو میرج ایکٹ 2017ء کی منظوری دینے کے اقدامات کو اجاگر کرتے ہوئے دہرایا کہ پنجاب حکومت تمام شہریوں کو مساوی حقوق اور مواقع کی فراہمی کے لیے کوشاں ہے۔