بلاول بھٹو کی لاڑکانہ کے ترقیاتی منصوبوں کی بروقت تکمیل یقینی بنانے کی ہدایت

پاکستان پیپلز پارٹی کے چیئرمین بلاول بھٹو زرداری کی سربراہی میں بھٹو ہاؤس نوڈیرو میں اعلیٰ سطح کا اجلاس منعقد ہوا جس میں لاڑکانہ ڈویژن کے اہم ترقیاتی منصوبوں پر پیش رفت کا جائزہ لیا گیا۔ اجلاس میں وزیراعلیٰ سندھ سید مراد علی شاہ اور چیف سیکریٹری آصف حیدر شاہ سمیت سینئر حکام نے شرکت کی۔ بریفنگ کے دوران بتایا گیا کہ لاڑکانہ شہر کے ہر گھر تک صاف پانی اور سیوریج کے جدید نظام کے دو سالہ منصوبے کی فزیبلٹی مکمل ہو چکی ہے، جبکہ موجودہ 9 ایکڑ پر قائم پھل و سبزی منڈی کو 40 ایکڑ پر محیط جدید منڈی میں منتقل کرنے کا عملی کام جنوری 2027 سے شروع ہو گا۔ اس کے علاوہ شہداد کوٹ سیوریج اسکیم کا 50 فیصد کام مکمل ہونے کی تصدیق کی گئی۔ بلاول بھٹو نے ہدایت کی کہ تمام منصوبوں کے معیار کو برقرار رکھتے ہوئے انہیں مقررہ مدت کے اندر مکمل کیا جائے۔