حافظ نعیم الرحمٰن کا کراچی میں گراؤنڈ کا افتتاح، کھلاڑیوں کو تحریک چلانے کا مشورہ

امیر جماعت اسلامی حافظ نعیم الرحمٰن نے پاپوش نگر کراچی میں پاک ونڈر گراؤنڈ کا باضابطہ افتتاح کر دیا ہے اور نوجوانوں میں کھیلوں کی سرگرمیوں کو فروغ دینے کے لیے 16 ٹیموں پر مشتمل فٹ بال ٹورنامنٹ کا آغاز بھی کر دیا ہے۔ اس موقع پر خطاب کرتے ہوئے انہوں نے کہا کہ حکومتی سطح پر نوجوانوں کے لیے کھیل کے میدان میسر نہیں کیونکہ ماضی کے حکمرانوں نے پارکوں کی زمینوں پر چائنا کٹنگ کی، تاہم جماعت اسلامی محدود وسائل کے باوجود عوام کو بہترین سہولیات فراہم کر رہی ہے۔ انہوں نے تعلیمی اداروں اور گراؤنڈز میں منشیات کے پھیلاؤ پر تشویش کا اظہار کرتے ہوئے اسے مقامی پولیس کی ملی بھگت قرار دیا۔ حافظ نعیم الرحمٰن نے اعلان کیا کہ ٹورنامنٹ کی فاتح ٹیم کو 1 لاکھ جبکہ رنر اپ کو 50 ہزار روپے نقد انعام دیا جائے گا اور الخدمت کے تعاون سے نوجوانوں کو فٹ بال کٹس و دیگر وسائل کی فراہمی یقینی بنائی جائے گی۔