تھر کے کوئلے کی پیداوار بڑھا کر صنعتی ترقی کا ذریعہ بنایا جا رہا ہے: شرجیل میمن

سندھ کے سینئر وزیر شرجیل انعام میمن نے اعلان کیا ہے کہ تھر کے کوئلے کو صرف بجلی کی پیداوار تک محدود رکھنے کے بجائے صنعتی ترقی کے لیے استعمال کیا جا رہا ہے، جس کے تحت تھر کول بلاک ٹو کی سالانہ پیداواری صلاحیت 7.6 ملین ٹن سے بڑھا کر 11.2 ملین ٹن کر دی گئی ہے۔ اپنے ایک بیان میں صوبائی وزیر نے بتایا کہ کوئلے کی پیداوار میں سالانہ 3.6 ملین ٹن کا اضافہ کیا گیا ہے اور اسے قومی ریلوے نیٹ ورک سے منسلک کرنے کا 68 فیصد کام مکمل ہو چکا ہے۔ انہوں نے وضاحت کی کہ دیگر صنعتی خریداروں کو کوئلے کی فروخت کے اخراجات کا بوجھ بجلی صارفین کے ٹیرف پر منتقل نہیں کیا جائے گا۔ شرجیل میمن نے مزید کہا کہ مقامی کوئلے سے کول گیسیفکیشن، میتھانول اور کیمیکلز کی تیاری جیسے جدید منصوبوں پر کام جاری ہے جس سے ملک میں توانائی کے تحفظ اور معاشی خودمختاری کے نئے مواقع پیدا ہوں گے۔