تنقید کرنا آسان جبکہ عملی طور پر کام کرنا مشکل ہے: بلاول بھٹو

پاکستان پیپلز پارٹی کے چیئرمین بلاول بھٹو زرداری نے لاڑکانہ میں ترقیاتی تقریب سے خطاب کرتے ہوئے کہا ہے کہ تنقید کرنا آسان جبکہ عملی کام کرنا مشکل ہوتا ہے، جبکہ طاقت کا اصل استعمال محفوظ، منصفانہ اور پائیدار مستقبل کی تعمیر میں ہے۔ انہوں نے سندھ میں صحت اور تعلیم کے شعبوں کو اپنی ترجیح قرار دیتے ہوئے کہا کہ بلوچستان سمیت دیگر صوبوں سے بھی لوگ علاج کے لیے لاڑکانہ آتے ہیں، اس لیے ہماری کوشش ہے کہ کوئی بھی شہری مالی وسائل نہ ہونے کی وجہ سے علاج سے محروم نہ رہے۔ بلاول بھٹو نے بتایا کہ لاڑکانہ میں 600 بستروں پر مشتمل عالمی معیار کے ہسپتال پر کام جاری ہے جبکہ پینے کے پانی اور دیگر مسائل بھی جلد حل کیے جائیں گے۔ ان کا کہنا تھا کہ پنجاب، خیبر پختونخوا اور بلوچستان کے مقابلے میں سندھ حکومت اعلیٰ تعلیم کے شعبے کو زیادہ سپورٹ فراہم کر رہی ہے۔