سیاست میں ڈائیلاگ ضروری، پہلے پی ٹی آئی خود متحد ہو: فیصل کریم کنڈی

گورنر خیبرپختونخوا فیصل کریم کنڈی نے پشاور میں میڈیا سے گفتگو کرتے ہوئے کہا ہے کہ سیاست میں مذاکرات اور ڈائیلاگ ضروری ہیں، لیکن اس کے لیے پہلے پی ٹی آئی کو خود متحد ہونا پڑے گا کیونکہ اس وقت اس کی چار سے پانچ فرنچائزز بن چکی ہیں۔ انہوں نے شہر میں جاری تجاوزات کے خلاف بلاامتیاز آپریشن کی حمایت کرتے ہوئے کہا کہ اگر ان کے اپنے فارم ہاؤس یا مفتی محمود مرکز میں بھی تجاوزات ہوں تو انہیں گرایا جائے، اس معاملے میں کسی کے خلاف انتقامی کارروائی نہیں کی جا رہی۔ وفاقی حکومت کی جانب سے 160 ارب روپے کے ریلیف پیکیج کا شکریہ ادا کرتے ہوئے انہوں نے کہا کہ وزیراعظم اور فیلڈ مارشل نے صوبے کو ہر ممکن تعاون کی یقین دہانی کرائی ہے۔ گورنر کا مزید کہنا تھا کہ پشاور انڈر پاس کی تعمیر سے شہریوں کی مشکلات کا احساس ہے اور ٹھیکیدار کو جلد کام مکمل کرنے کی ہدایت کی گئی ہے۔