پنجاب کی عدالتوں میں ڈیڑھ ارب روپے کا جعلی کورٹ فیس ٹکٹس سکینڈل بے نقاب

چیف جسٹس لاہور ہائیکورٹ مس عالیہ نیلم کی خصوصی ہدایت پر لاہور سمیت پنجاب بھر کی عدالتوں میں جعلی کورٹ فیس ٹکٹس کی تیاری اور فروخت میں ملوث ایک بہت بڑا نیٹ ورک بے نقاب ہو گیا ہے۔

ابتدائی تحقیقاتی رپورٹ کے مطابق اس جعلی نیٹ ورک کے ذریعے قومی خزانے کو مبینہ طور پر ڈیڑھ ارب روپے کا سنگین مالی نقصان پہنچایا گیا ہے۔ چیف جسٹس عالیہ نیلم نے سخت موقف اختیار کرتے ہوئے واضح کیا کہ عدالتی نظام کے ساتھ فراڈ اور قومی خزانے کو چونا لگانے والے عناصر کسی رعایت کے مستحق نہیں ہیں۔ ان کے احکامات پر اینٹی کرپشن کی ٹیموں نے ضلع کچہری لاہور کے مختلف دفاتر پر چھاپے مار کر جعلسازی میں استعمال ہونے والا سامان، مشینیں اور لاکھوں جعلی ٹکٹس برآمد کر کے کئی افراد کو گرفتار کر لیا ہے۔

اینٹی کرپشن حکام نے سول کورٹ کی کاپی برانچ کے انچارج زمان اللہ اور ماڈل ٹاؤن کچہری کے ریکارڈ کیپر اعجاز احمد سمیت 9 افراد کے خلاف باضابطہ مقدمہ درج کر لیا ہے۔ تحقیقات کے مطابق 2025 اور 2026 کے دوران سرکاری خزانے میں جمع شدہ کورٹ فیس اور عدالتی کام کے حجم میں واضح تضاد پایا گیا۔ صرف لاہور کی حد تک روزانہ 15 لاکھ روپے کی کورٹ فیس متوقع تھی مگر سرکاری ریکارڈ میں انتہائی کم رقم جمع ہو رہی تھی۔ حکام کا کہنا ہے کہ ریکارڈ کی چھان بین جاری ہے اور جلد مزید اہم گرفتاریوں کی توقع ہے۔